Tumuaki Tuarua
We usually respond within a week
Te Kura o Ngāti Whātua ki Tāmaki
Aratakina te ako, whakaarahia te angitu. Tukua tō kaha ki te whakatupu i tō tātou kura.
E kimi ana a Ngāti Whātua Ōrākei i tētahi Tumuaki Tuarua whai pūkenga nui kia tū ki Te Kura o Ngāti Whātua ki Tāmaki, tō tātou kura kaupapa Māori hou kei te pokapū o Tāmaki Makaurau.
He tūranga motuhake tēnei mō te tangata e hiahia ana ki te whai wāhi nui ki te whakatupu i tētahi kura e ū pū ana ki ngā wawata, te tuakiri me ngā uara o Ngāti Whātua Ōrākei. Ka mahi ngātahi koe ki te Tumuaki ki te ārahi i ngā kaupapa ako mō ngā Tau 9 ki te 13, ā, ka noho hoki koe hei pouako ki te taha o ngā uri.
Hei Tumuaki Tuarua, māu e ārahi te whakatinanatanga o te marautanga, te kounga o te whakaako, ngā tukanga aromatawai, te eke angitu o ngā uri, me te whakapakari i ngā pouako. Ka noho hoki ki a koe te kawenga nui ki te whakatū me te ārahi i ngā pūnaha NCEA me NZQA o te kura, tae atu ki te whakaū i te kounga o ngā aromatawai, ngā tukanga whakaōrite, me te waihanga i te anga Consent to Assess a NZQA mō te kura.
He tino ara tēnei ki te waihanga i ngā pūnaha, ngā tikanga mahi me ngā ara angitu mai i te tīmatanga, i roto i te taiao kaupapa Māori e noho ai Te Marautanga o Aotearoa, Ngāti Whātua Ōrākeitanga, me te eke panuku o ngā uri, kia Māori ki te pūtake o ngā mahi katoa.
Mō te tūranga
Māu e:
Mahi tahi me te Tumuaki ki te ārahi te whakatinanatanga o Te Marautanga o Aotearoa me ngā aronga matua o te marautanga ā-kura, ngā kaupapa mātauranga me ngā mahi ako mō ngā Tau 9 ki te 13.
Tautoko, ārahi, whakapakari hoki i ngā pouako kia tupu ai te kounga o te whakaako me ngā hua ako mō ngā uri.
Ārahi i te aroturuki whānui o te kura kia eke te angitutanga, te taetae mai, te whai wāhi ki te ako me te oranga o ngā uri.
Tautoko i te waihanga me te whakatinana i te anga aromatawai o te kura.
Whakatū me te ārahi i ngā pūnaha NCEA, ngā tukanga whakaōrite me ngā whakaritenga a NZQA.
Tautoko i te whanaketanga o ngā hōtaka whakaako, ako hoki kia kounga, kia hāngai ki ngā uri me ngā wawata o te kura.
Noho tonu hei pouako, hei tauira hoki mō te kounga o te whakaako i roto i te akomanga.
Whakawhanaunga, manaaki hoki i ngā hononga ki ngā uri, ngā whānau me te iwi.
Ko wai koe?
He kaiako whai rēhitatanga, he kaiārahi mātauranga whai wheako hoki koe, ā:
He matatau, he tino pakari rānei tō reo Māori, ā, e māia ana tō tū i roto i Te Ao Māori.
Kua whai wheako koe ki te ārahi i ngā horopaki rūmaki reo Māori, kaupapa Māori rānei.
He hohonu tō māramatanga ki Te Marautanga o Aotearoa.
E ngākau nui ana koe ki te hiki i ngā uri kia eke panuku, kia eke tangaroa hei Māori.
He wheako ōu ki te whakawhanake marautanga, ki te aromatawai, me te whakamahi tika i ngā mōhiohio hei whakapakari tonu i te kounga o te ako.
E mōhio ana koe, kua whai wheako rānei koe, ki NCEA, ki ngā whakaritenga a NZQA me ngā pūnaha whakaū kounga.
He tangata ārahi, he kaiwhakapakari hoki koe, e taea ai e koe te poipoi ngā pūkenga me te pitomata o ētahi atu.
He māramatanga tōu ki te Ngāti Whātua Ōrākeitanga, Ngāti Whātua Whānuitanga me ngā wawata o Ngāti Whātua Ōrākei, he ngākau titikaha rānei tōu ki te ako me te whakapakari i taua māramatanga.
E hihiko ana koe kia whai wāhi ki te whakatū, ki te whakatupu hoki i tētahi kura Māori hou, auaha hoki.
He aha ngā hua mōu?
He whai wāhitanga motuhake ki te whakatupu i tētahi kura hou mai i ōna pūtake.
He tira kaiārahi tautoko, mahi ngātahi hoki.
He wāhi nui ki a koe ki te whakatau i ngā aronga o te marautanga, te aromatawai me ngā ara tohu mātauranga mō ngā uri.
He hononga kaha ki te iwi, ki te whenua me ngā tikanga kaupapa Māori.
He utu e hāngai ana ki te mana me ngā kawenga o te tūranga.
He whai wāhitanga ki te waiho i tētahi taonga tuku iho mō ngā uri, ngā whānau me ngā reanga e heke mai nei.
Ngā whakaritenga o te tūranga
Me:
Whai Tiwhikete Whakaako Whaimana o nāianei nā Te Kaunihera Kaiako o Aotearoa.
Whai tohu e āhei ai koe ki te whakaako i te taumata kura tuarua.
Whai mana ki te mahi ki Aotearoa.
- Department
- Education
- Role
- Kaiako
- Location
- Te Kura o Ngāti Whātua ki Tāmaki
Te Kura o Ngāti Whātua ki Tāmaki
Current Opportunities
About Ngāti Whātua Ōrākei
We are the tangata whenua of Tāmaki with our mana over the land and sea being underpinned by take tūpuna (ancestral relationships), take raupatu (taking of the land and sea by traditional warfare), ahi kā (unbroken occupation) and tuku whenua (traditional gifting of land ).
Ko au te tangata whenua o Tāmaki pokapū me Te Waitematā. He take tupuna, he take raupatu, he ahi kā, he tuku whenua, te takenga mai o tōku rangatiratanga, ki runga o Te Kahu Tōpuni o Tuperiri e hora ake nei.